は～え～ゴンゴン

とぅじが　みーむんＹシャツ　こーてぃちぇーたくとぅ
ちちゃれー　はちこーさぬ
なんでかね～。

んかしから　丸首ぬセーターとぅか　ウール系や　さっこう
はちこーさぬ　ちらんたん　いひぐゎー　あしかけーからー
いーごーさぬ　なあでーじ
だっからよ～。

うりびけーや　ちゃあんならんさあ
だ～るわけさあ。

※とぅじが＝妻が　みーむん＝新しい　Ｙシャツ　こーてぃ＝買って
　ちぇーたくとぅ＝きていた　ちちゃれー＝着けてみると
　はちこーさぬ＝（チクチクする感じ）　んかしから＝昔から
　丸首ぬセーターとぅか　ウール系や　さっこう＝とても
　はちこーさぬ　ちらんたん＝着けなかった　いひぐゎー＝少し
　あしかけーからー＝汗をかくと　いーごーさぬ＝かゆくて
　なあでーじ＝もう大変　うりびけーや＝これだけは
　ちゃあんならんさあ＝どうにもならないなあ
  

ありくり　会議うてぃ　決みてぃん　たーんいじかん
なんでかね～。

どぅなーくとぅやれー　一旦決みれーから　しぐいじちゃーに
けー片付じきーしが　さっこう　てぃー　はごーさん
だっからよ～。

うむいぬちゅーされー　くとぅぬふか　うぬきむちなゆん
だ～るわけさあ。

※ありくり＝あれこれ　会議うてぃ＝会議で　決みてぃん＝決めても
　たーん＝誰も　いじかん＝動かない　どぅなーくとぅ＝自分のこと
　やれー＝だったら　一旦決みれーから＝一旦決めたら　しぐ＝すぐ
　いじちゃーに＝動いて　けー片付じきーしが＝さっと片付けてしまうのだが
　さっこう＝とっても　てぃーはごーさん＝もどかしい（やってしまいたいができない様）
　うむいぬ＝思いが　ちゅーされー＝強いと　くとぅぬふか＝ことのほか
　うぬ＝この　きむちなゆん＝気持ちになる
  

うってぃー　まんぐらから　とぅじぬ　ちむくじらしし
さらひっちー　ごーぐちそーん
なんでかね～。

どぅくごーぐちぬすぎてぃ　あとー　わんまでぃ　
けーくさみち　うふあびーしねーらん
だっからよ～。

ひーじーやれー　よーあびらちょーけーんち　ないしが　
今週やしくちぬ　まんでぃ　うたとーたくとぅ　あんなとーさ　
なーら修行ぬ足らんさあ
だ～るわけさ～。

※みーとぅんだ＝夫婦　おーえー＝喧嘩　うってぃー＝おととい
　まんぐらから＝ぐらいから　とぅじぬ＝妻が　ちむくじらしし＝機嫌が悪く
　さらひっちー＝しょっちゅう　ごーぐちそーん＝小言を言っている
　どぅく＝あんまり　ごーぐちぬすぎてぃ＝小言ばかりいうので
　あとー＝とうとう　わんまでぃ＝自分まで　けーくさみち＝怒ってしまい
　うふあびーしねーらん＝大声を出してしまった　ひーじーやれー＝いつもだったら
　よーあびらちょーけーんち＝言わせておけと　ないしが＝できるのだが　
　今週や　しくちぬ＝仕事が　まんでぃ＝多くて　うたとーたくとぅ＝疲れていたので
　あんなとーさ＝こうなってしまった　なーら修行ぬ足らんさあ＝まだ修行が足りないなあ

  

ぬーんきーん　値上がりし　でーじなとーっさあ
なんでかね～。

てぃーちしなむんぬ　値上がりしぇーからー　むる　便乗値上げ
なままでぃ　やしぇーぐゎーや　たまなーから　たまちさから
実家からいーとーたしが　時期ぬ過ぎてぃ　スーパーんかい
こーいがいんじゃれー　どぅくたかさぬ　こーいかんてぃーすん
だっからよ～。

まーがらんかい　じーかやあに　むじゅくいすがやー
だ～るわけさあ。

※ぬーんきーん＝何もかも　値上がりし　
　でーじなとーっさあ＝大変なことになっているなあ
　てぃーち＝ひとつ　しなむんぬ＝＝品物が　値上がり
　しぇーからー＝したら　むる＝全部　便乗値上げ
　なままでぃ＝今まで　やしぇーぐゎーや＝野菜は
　たまなーから＝キャベツから　たまちさから＝レタスから
　実家から　いーとーたしが＝もらっていたが
　時期ぬ過ぎてぃ＝時期が過ぎて　スーパーんかい＝スーパーに
　こーいが＝買いに　いんじゃれー＝行ったら
　どぅくたかさぬ＝とても高くて　こーいかんてぃーすん＝買いきれなくなる
　まーがらんかい＝どこかに　じーかやあに＝土地借りて
　むじゅくいすがやー＝農業やろうかなあ
  

ちゅんでぃ　いいしぇー　期待ぬはんでぃれーからー
さっこう　ちるだいすん
なんでかね～。

ぬーがらくとぅうくすんち　はまてぃん　なかなかめーんかい
あがかん　ないぎさーなてぃん　また　ならんなてーういし
ゆぬなかんでぃいいしぇー　ままならん
だっからよ～。

やしが　ままならんくとぅる　はまてぃ　いきわるやん
これが私の生きる道
だ～るわけさ～。

※ちゅんでぃ＝人と　いいしぇー＝いうのは　期待ぬ
　はんでぃれーからー＝外れたら　さっこう＝とても
　ちるだいすん＝気が抜けてしまう　ぬーがら＝何か
　くとぅ＝事を　うくすんち＝起こそうと　はまてぃん＝がんばっても
　なかなか　めーんかい＝前に　あがかん＝進まない
　ないぎさーなてぃん＝できそうになっても　また
　ならんなてーういし＝できなくなって　ゆぬなかんでぃ＝世の中と
　いいしぇー＝いうものは　ままならん＝思うようにならない
　やしが＝だけど　ままならんくとぅる＝思うようにならないことを
　はまてぃ＝がんばって　いきわるやん＝いかなきゃ
　これが私の生きる道